Dan 4 | TVK | STEP | Suv toto Nekukanesa tesa sepinien ak tekapis teha mi kantri xil vus e ut etan, mi hisit moletin xil vus, e mi ngan xil xa di lasepin ni sepinien sav xil. E tisen nan tehiteni temak: Hosien e tomat iti mi xamim.

Daniel 4

Iahova Pol ni Suv Toto Nebukanesa Pus Kila xa Holesok Xil Vus e Ut Etan Di Pe Hen

Daniel 4:1-8, 19-37

1 Suv toto Nekukanesa tesa sepinien ak tekapis teha mi kantri xil vus e ut etan, mi hisit moletin xil vus, e mi ngan xil xa di lasepin ni sepinien sav xil. E tisen nan tehiteni temak:

Hosien e tomat iti mi xamim.

Muteong ni naha xa inou nabit namiteni usil merekel xil e holesok sav xil xa tellep xa Hi te Xeihen tepisen ni minou.

3 Merekel xil xa Hi pisen ni minou bos pupu.
Xi di pisen xeihen nan nggo sexien xil xa tellep xa di pol ni.
Lelaxatien nan misakras vavus vatova,
e xeihen de hen vehakut tang.
4

Vatei, inou, Nebukanesa, natete nim mavan, di natelonge tehos xa tehos, e di natepus hosien vehakut tang e meulien navan.

5 Di, e vongien tei, natepus metuveen tei xa tepol ni nou uluk tekan tova tang. Reitin, natepus metuveen tei xa misak ni nou namalili pupu. 6

Ma nakes viton eilep navan xil vus tahal Babilon lamei vituei tengan lasep kil koute te metuveen ak minou.

7 Melele xa moletin te leleen xil, moletin te vongou xil, eimas xil, tetel moletin te pus kil hitu en xil latemei visal nou, natehit rat metuveen ak mi xil. E xil latesakras lasep kil koute teni minou. 8 E ngan xa be kor e moletin xil ak xa bemei visal nou, hisen Daniel (e lakesi mun ni Beltesasar xa nggoni his hi navan). Moletin ak, ninin na hi eo xil polu en. Ma natehit rat metuveen navan mini. 19

E melele xa Daniel Beltesasar telong usili, en tevon tetat temak, e nenemien nan tehasi. Ma natehiteni mini natehit, “Beltesasar, onamaen metuveen ak ti e koute teni nasak ni xouk ulum nakan.”

Ma Beltesasar tehiteni minou tehit, “O suv toto xa hisom be nesao xa be nesao, ieok bei li tengan metuveen ak e koute teni imei ihe reitin mi elu nam xil e nave xouk ti.

20 Vatiei xa opusi e metuveen nam, koute teni da. Xi matu be eilep e nggeih. Be teviei ba duxoh tilang hat nesao e moletin xil vus te ut etan lakila lapusi. 21 Ute xil bos xa bos, e huite xil pipin tengan vahengan holesok xil vus e ut etan. Paen be von ngengelen na vongoro xil, e tuman xil mei di labas nunu mae e lite xil. 22 O suv toto, xouk vari iaxa obe vatiei ak. Xouk omei obe eilep e onggur xeihen. Reitin, xeihen nam be nesao pupu e lelaxatien nam ba duxoh rin xil vus e ut etan. 23

“Melele xa di tamu opus metuveen ak, masxaxa tei nggo ut nesao bemei e ut etan e biteni bit, 'Mutei rat vatiei ak ihe tan e mupangei. E muling vatite e amulite xil kestang liti e tan. Xamim muvar xole ixeih ni stirap xil xa be aean e brons. Ti, mulingi itat e valkesao e hilaep te husmunae xil. Vatiei ak be vole tei usil moletin tei. Xi ha imos itel vongoro xil e nin ti isali huram ihe lu he sav (7).

“O suv toto xa hisom be nesao xa be nesao, koute te metuveen xa Hi te Xeihen misemae ni tengan mei istal minuk mak:

25 moletin xil lihol ratuk reling rute xil xa ladi en e uha utinga itel vuran xil. Huram ihe lu e he sav (7), xouk ti ua husmunae ixoni buluk xil e upat utat valkesao e nin ti isaluk. Utat imak ituxoh melele xa xouk mei unem kila sung xa lelaxatien te kantri xil vus e ut etan di pe he Hi te Xeihen kestang, e xi mikila isa ni mi moletin eah xa xi ien bei tengan vasa ni mini. 26

“Melele xa masxaxa tesemae tengan laling vatite e amulite xil litit imak e tan, ngan ak mun koute teni di. Lelaxatien te kantri nam, imei rilomun minuk melele xa unem kila xa lelaxatien te ut etan de pe he Hi te ut nesao kestang.

27 Mak, ma suv toto, ihos minuk xosxa uhusil nenemien navan li. Uhiles ra tesaen nam xil e upol ni sexien xil xa momal. Uling sexien nam xil xa mikavui e ulaxat kuh ngan xil xa mosav xil di lapangei xil. Xosxa upol ni imak, ma xos ukila tamu upus hosien.” 28

Holesok xil vus ak mei testal minou, suv toto Nebukanesa.

29 Aveti lu e le (12) mei tetavi, natete nim mavan e Babilon. E vatei, di natkakao natkapis nim mavan nesao e rute tei xa be motan. 30 E melele xa napus taon navan tahal Babilon, inou natsep tasok natehit, “Ei ... mali. Napus taon navan ak bos xa bos tova tang. Del xeihen navan tang napol ni mei be voninok xati tengan vapisen ni xa inou nabe eilep pupu e xeihen navan be nesao mili.” 31

Melele xa di tamu nasepin, rae tei tesepin minou texo ut nesao tehitene, “!Suv toto Nebukanesa, uteong ni nou! Ngan ak be naha xa Hi misemae ni tengan mei istal minuk. Lelaxatien xa tete hem, taxeak, Hi nggur rati ranuk.

32 Xosali tang, moletin xil lihol ratuk reling rute xil xa ladi en, e uha utinga itel vuran xil. Huram ihe lu e he sav (7), xouk ti ua husmunae ixoni buluk xil tang. Xouk utat imak ituxoh melele xa xouk mei unem kila sung xa lelaxatien te kantri xil vus te ut etan de pe he Hi te Xeihen kestang, e xi mikila isa ni mi moletin eah xa xi ien bei vasa ni mini.” 33

Vatakes, sepinien ak mei testal tehe reitin e meulien navan, xa nabe suv toto Nebukanesa. Moletin xil latehol rat nou natehe reling xil, e inou ba natetinga, di natea husmunae texoni buluk, e nin di tesal tenbeok. Hiluk temeul tehe tepiei texoni votatei tomalohos, e kus heok xil temei tehe tepiei texoni kus le vuesik tang.

Melele xa huram lu e le (7) ak mei tetavi, inou, suv toto Nebukanesa, nateketeh tehe tilang hat nesao e nenemien navan temei tehos rilomun. Di, natpet rat his Hi te Xeihen e natsa merereen mini vengan xa xi be eilep pupu e di meul da vehakut, e natehit,

“Lelaxatien nan misakras vavus vatova.
Xeihen de hen vehakut tang.
35 E ketehen, moletin xil te ut etan labe neta sav tang,
e masxaxa xil te ut nesao del moletin xil te ut etan ladi pe hen.
Moletin tovuol mikila vasikoe xol naha xa xi bit vapol ni,
mu vasisi vahit, '?Di opol ni mak veneh?'”
36

Melele xa nabiteni mak, nenemien navan mei momal tevi rilomun. Di, eilep navan xil lalang ves nou e langgur pilei nou. Xil lamerere ni nou mili ngan xa tetiamu, e lasa rilomun ni lelaxatien te kantri navan bemei mun e heok.

Misak ni, xosali ak, inou, Nebukanesa di nasa memesien e merereen mi Hi xa be Suv Toto te Ut Nesao e di napet rat Hisen. Holesok xil vus xa pol ni bos e momal tevi, e xi mikila ihas tan ni nenemien na ngan xil xa di labut xil.

Nebukanesa telaxat moletin xil huram vahis mun. Di, temat, e suv toto sav xil latemei latehur voninen, tei tevus, di, tei mun. Di, huram hanutap tei e lim mun (25) mei tetavi tetutou ni maten na Nebukanesa, ma suv toto tei mun temei tehur von xeihen tahal Babilon, hisen Belsesar.